John Estrada, mayroong naipundar na Mansion sa loob ng isang exclusive country club

Karamihan sa mga artista ay sa siyudad naninirahan upang mabilis silang makarating sa set ng kani-kanilang pinagta-trabahuhang proyekto, ngunit kung bakasyon ang pag-uusapan ay marami sa kanila ang may kanya-kanyang bahay bakasyunan sa iba’t-ibang mga probinsya.

Isa sa mga ito ay ang aktor na si John Estrada na mayroong pribado at napakagandang bahay bakasyunan sa loob ng isang golf and country club sa may Dasmariñas, Cavite.

Tila mahigit ilang milyon ang lupa at bahay na ito sapagkat ito ay nasa loob ng isang eksklusibong country club na ang mga mayayaman at miyembreo lamang ang nakakapasok dito.

Dugo, pawis at luha ang naging puhunan ni John sa magarang bahay na ito na tinuturing niyang “dream house” sapagkat dito niya ibinuhos ang kaniyang pinag-ipunan sa kaniyang karera sa industriya noon.

Makikita ang iba’t-ibang parte ng bahay sa mga litrato na ibinabahagi ng aktor sa kanyang Instagram account tuwing namamalagi ito roon kasama ang asawang Brazilian model/beauty queen na si Priscilla Meirelles at ang kanilang 8 taong gulang na anak na si Sammanta Anechka.

Agaw-pansin ang pagiging maaliwalas ng kanilang bahay dahil sa malalaking bintana at mga pader na gawa sa salamin na nagbigay daan upang makapasok ang natural na ilaw sa loob tuwing umaga.

Hilig ng mag-anak ang magpalipas oras sa kanilang swimming pool o kaya naman sa kanilang living room kung saan nanonood ang mga ito sa malaki nilang telebisyon.

Makikita rin mula roon ang magandang view ng golf course sa paligid na siyang nakadadagdag sa nakaka-relax na pakiramdam sa loob ng bahay.

Doon mismo sa bahay na iyon nagdiriwang ng mahahalagang okasyon ang pamilya kagaya na lamang ng pasko kung kailan nakakasama rin nila ang mga anak ni John na sina Inah, Moira, Kaila at Yuan sa aktres na si Janice de Belen na siyang unang asawa nito.

Taong 2004 pa nang mapasawalang-bisa ang kanilang kasal at masaya ang aktor na nakakapag-usap na sila nang maayos ng dating asawa tungkol sa kanilang mga anak, dahil rito ay malayang nakakabisita ang mga ito sa kanya tuwing nangungulila sila sa isa’t-isa.

Sa kabilang banda naman ay tila hindi alintana ng aktor ang pagkakaroon ng lockdown dahil nagkaroon ito ng oras para makasama ang kanyang mag-ina sa mga nakalipas na buwan habang inee-enjoy ang kaniyang napakalaking bahay sa Cavite.